XI Международная независимая литературная Премия «Глаголица»

Татлы йокыдан уяндым,

Гөр-гөр килгән шау-шуга.

Кемнәр генә сүзгә килгән,

Ни булган соң аларга?

Тавышлары чиксез матур

Тик нигәдер ачулы.

Иртә таңнан ни бүлешә,

Кайдан бу ыгы-зыгы?

Берсе канатларын сирпеп

Бугай нидер аңлата,

Гөр-гөр килеп гүя шулай

Барын тынычландыра.

Икенчесе койрыгын селкеп,

Тырнакларын күрсәтә.

Барыбер җиңә алмассың

Диеп әллә инде кисәтә?!

Йөгереп чыктым яннарына

“Әй,дусларым, тыңлагыз!

Дуссыз яшәү – күңелсез ул,

Дуслыкны сез саклагыз!”

Шулай песи белән күгәрчен

Янә татулаштылар.

Инде бүтән беркайчан да

Ызгышмаска булдылар.