X Международная независимая литературная Премия «Глаголица»

Нигә иртә тордың, диеп,

Сезме сорау бирүче?

Горурланып җавап бирәм:

Мин бит бүген – көтүче.

«Тор, кызым», — дип, әбием дәшкәч,

Шунда ук сикереп тордым.

Тиз-тиз генә ашап алдым,

Бит-кулларымны юдым.

Озын чыбыркымны асып,

Чыгып киттем урамга.

Әнә, күпме кеше чыккан,

Сыерларын куарга.

Барысы да мине мактый,

«Зур үскән бу кыз», — диләр.

Көннәр матур торсын, диеп,

Теләкләрен телиләр.

Горур атлап китеп бардым,

Мин бит бүген көтүче.

Үгез хәтле үгезне дә,

Үз артымнан йөртүче.