XI Международная независимая литературная Премия «Глаголица»

     Көтү көттем әле кичә,                                                                                                                                     

     Чираты безгә җиткән.                                                                                                                                     

     Басу, кырлар, сахраларны                                                                                                                           

     Күрәсем килде күптән.

     Җылы яңгырлар файдасы-                                                                                                                           

     Күкрәп үскән яшь чирәм                                                                                                                                 

     Яшел диңгез кебек булган                                                                                                                   

     Минем әйләнә-тирәм.

    Сыерларым туеп ятты                                                                                                                                       

    Ял итәләр үзәндә.                                                                                                                                           

    Җир җиләге ашап төштем,                                                                                                                             

    Тауга менеп үзем дә.

     Хозурланып карап тордым,                                                                                                                           

     Ямьле тау битләренә,                                                                                                                             

     » Күгәрчен күзләре » үскән                                                                                                                 

     Инешнең читләренә.

     Тыныч кына агып ята,                                                                                                                                     

     Көмештәй чиста суы.                                                                                                                   

     Төбендә, кара мәрҗәндәй                                                                                                                                   

     Тукмакбашлары тулы.

      Әй, туган ягым!                                                                                                                               

      Бик яратам җәйләреңне,                                                                                                                         

      Гөмбәле көзләреңне.                                                                                                                           

      Әгәр синнән аерылсам,                                                                                                                                

      Сагынмый түзәрменме?