XI Международная независимая литературная Премия «Глаголица»

Тәрәз рамнарының эчләрендә

Алтын яфрак кабат әйләнә

Укытучы абый! Җитди караш!

Ә мин – җүләр, телем бәйләнә!

Тилмереп ул, түзем генә көтә,

Туган телдә бер сүз әйткәнем.

Ә мин кабат табиб диеп түгел,

Горур гына врач дип әйткәнмен

“Сәлам” урынына “привет” димен,

“Как дела” да шуңа ялгана.

Сөйләмемдә рус сүзләре үрчи

Бер-бер артлы чүпләп ал гына.

Җаныбызны дәваларга теләп,

Абый чүпләп-чүпләп карый да,

Күзләренә бер моңсулык иңә,

Аны чүпли-чүпли арый да.

…Абый никтер тагын моңсу бүген,

Минем телем тагын бәйләнә!

Сары яфрак тәрәзәдә түгел,

Абый күзләрендә әйләнә.